РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Рыгор Барадулін
Кантэкстны тлумачальны слоўнік
Планэта Матуль
1
        Ты прахукваеш у шыбіне сваё вакенца ў зімовы сьвет. А на плечы табе цёплай аблачынкай апускаецца апранашка, сагрэтая матчынымі плячыма.
        Сьнег на шчацэ растане, і зашчыміць прытухлым болем трывога. Адчуеш адразу, як пачынае цяплець у цябе пад нагамі зямля, адтуль, з малых гадоў, з малечых сьлядоў.
        I першы мароз запахне матчыным дыханьнем, халодным малаком і самым смачным у сьвеце, бо часцей яго не хапала, хлебам пасьля вайны...
        Праталкі першыя, першыя прысмалкі на санным сьледзе – сьляды вясны.
        Гэта матчыны вочы першыя выглядзелі здалёку вясну. На сакавіцкія кветкі зірнеш і сорамам зойдзешся. Некалі не прынёс іх маці, забыўся прынесьці, вырашыўшы, што гэта здасца занадта сантымэнтальным учынкам, не мужчынскім. Адно забыўшыся, пакуль жывая маці, ты ўсе роўна дзіця горкае і дужа безабароннае...
        Лета на аграблях дасушвае на вятрах падвялае сена, на матчыных аграблях.
        I навальніца летняя гразіцца зусім не грозна, ня злосна, яна спагадліва дакарае, як маці. Пазьней дойдзе да цябе сэнс прымаўкі: граза у лес ня йдзець...
        Восень у матчыных даланях трымае важкія пахі з гароду і саду. Кожнаму каліўцу кланялася маці не адзін раз, з кожным яблыкам гаварыла, горам і радасьцю дзялілася.
        Незабытна пахне варыва з маладых прыпасаў. Новая навіна на старое чэрава – усьміхаецца прыгавор разам з маці...
        Увесь год усяго жывога і зялёнага пачаты і завершаны матчынымі клопатамі, матчыным стараньнем.
        I год жыцьця нашага ад вясны да зазімка ці да глухой зімы – ён матчын, ён нам дадзены матуляй.
        Памяць нашая пра сябе малых і веданьне сябе саміх – ад маці. Пакуль жыве маці, жыве нашая памяць жывая.
        Толькі маці і зямля, яны ж абедзьве жанчыны, разумеюць сэнс жыцьця, нас, дзяцей сваіх.
        Экзюпэры назваў зямлю нашую планэтай людзей. Я назваў бы – планэтай Матуль.

Падабаецца     Не падабаецца
2009–2022. Беларусь, Менск.