Званічна
|
|
|
|
Высіліся дзьве званіцы, судакранаючыся позіркамі ў нябёсах, і маўчалі – іх званары, змовіўшыся, аднаго дня самагубна ўдушыліся на вяроўках-языках сваіх званоў... Справілі трызну па іх (усё ж званары!) дый новых шукаць ня сталі. Чортава справа – званары рукі на сябе наклалі, відаць, бачаньне прарочае мелі; лепш не чапаць: калі Гасподзь схоча, дык сам вырашыць. Куды людзям лезьці!.. Званіцы-шыбеніцы на адзіноце змагаў сум... А тужлівае маўчаньне званоў зьняверыла званіцы ў іх неабходнасьці й наканаванасьці, у іх прадвызначэньні... Званіцы згорклі, засамоціліся, панурыліся, ужурбелі без гаспадароў... Званіцы зьнямелі бяз голасу і развучыліся размаўляць... і зь небам, і зь людзьмі... Толькі апоўначы, у час княжаньня поўні, стагналі-клікалі званы... Ды ніхто не зважаў на тое – на іх галасы забыліся... Праз колькі часу аблуднаю сьцяжынаю (толькі таму, што не зарасла! – доўга не зарастаюць сьцяжыны да здраджаных званіцаў...) праходзілі юныя мнішкі – і ўбачылі: на адной званіцы крыжы былі перавернутыя долу... Мнішкі з жагнаньнямі й маленьнямі кінуліся наўпрост уцякаць ад д’яблавагадзіва і дабеглі ажно да другой званіцы. А на ёй замест крыжоў былі колы, на якіх буслы ўладкавалі гнёзды. I глядзяць з найвысокага гнязда два сівыя птушаняці й не па-птушынаму, скразьліва енчаць, бы ўбогія нямыя, якім мову заняло. Укленчылі мнішкі ад спуду-сполаху й нечаканасьці ля званіцы, а буслы ўздрыганулі крыламі, ды ўзвысіліся над імі, узьляцеўшы з гняздоўяў і кружлялі над галовамі боскіх абранак, клекаталі-захлыналіся, бо мелі пра што апавесьці, ды не маглі, бы скардзіліся на забарону свой сапраўдны голас падаць, выгаварыць свой боль, сваё паданьне, давесьці, што птахі яны, што людзі, што званары... Голас з нутра так і драў іх, так і пульсаваў, ціснуў на горлы, на дыхлы, імкнуўся прагучаць зь дзюбаў – вырываліся паланёныя душы званароў з бусьліных целаў!.. А з крылаў густа-густа сыпаліся, сыпаліся, бы сьнягі з бухматых зімовых аблокаў на твары, плечы, сьпіны Хрыстовых нявестаў... Ня пёры – сівыя валасы званароў... Замест легенды
1 Ён прасіў: «Не пярэч мне, годзе!.. Я з табою хачу пабыць, зьбегчы прэч – гуляць па стагодзьдзях, узахлын у званы званіць!..» «Вы паэт, Вы найлепшы, то бок Вам прарочыць, а не зьвінець!..» «Я наскрозь празьвінеў – да кропак, досыць вершамі мне старэць... Падыдзі па вадзе, па цьвердзі!.. – палынова паклікаў ён. – Паглядзі: паэт перад сьмерцю – фотаздымак... Жыцьцё як сон... Ты зірні, як глядзіць сувора, бы пярэдзіць: дрэнь не пішы! Гэх, жыцьцё, як і сьмерць, – ня гора – інтэрмэдыя для душы!.. Мы шчасьлівыя, бо зь мільёнаў нарадзіліся толькі мы...» – ён казаў і маўчаў стамлёна, і раз-пораз глядзеў як нямы. «Ты ня чуеш? – званы шалеюць, быццам гэтыя мы – ня мы... Так, званарні мяне здалеюць, зь імі – страчаныя званы!.. Ты ня чуеш? – званы канаюць – разьбіваюцца аб званы... Ты ня чуеш? – званы палаюць, быццам гэтыя мы – яны... Ты ня чуеш? – дрыжаць званіцы ад стагнаньня сваіх сыноў, і сьляпая сьвятарнасьць ніцма ля падножжа званіц ізноў, як шалёны шчанюк, скуголіць, як чумное дзіця, дрыжыць, і сама пра сябе ўсіх моліць, і жагнае сівыя крыжы... Насамрэч званы не для сцэны: языкі іх – бронь Бог! – не ілгуць! Ты ня чуеш? – званічныя сьцены, як прарваныя трубы, гудуць!.. Ты ня бачыш? – званы ж у раны, у разломы аглухлы боль заціскаюць!.. Званар – абраны!.. На далонях яго – кроў і соль!.. Ты ня бачыш? – яму на зоркі, як на сонцы, глядзець – баліць, шлях яго палынова-горкі, ён званамі жыве і сьніць!.. Праўду мае адну: ён – лішак і ня ведае іншых уцех, як глядзець з вышыні на мнішак, і штурхаць, і гайдаць звон-бег, і ляцець, імкнучыся звонам, з кампанілы ў крылаты сум, і спадзеўна зеўрыцца зломам – той адзінаю думкай між дум, што ня мае труны грамніца і званар ня мае труны, бо труной званару званіца! Ўваскрасаюць пад звон званары!»
|
2 Я ўсё бачыў – глядзелі словы! – нада мною стаяў званар, ён званіцаю адмысловай узвышаўся, як уладар. Ён гукаў: «Дай руку... ўваскрэсьні!» Я імкнуўся ўвесь да яго!.. Раптам – стогн з-пад зямлі ў тым мейсцы: «Не старайся – не да таго!..» Гэта сьпевы званіц-тапельніц, гэта сьпевы іх званароў... Мне спаліла руку, як цяпельніц 1, і званар на званіцы зароў!.. Ён хацеў зваяваць міжчасьсе, ён хацеў вярнуцца дамоў, ён забыўся, што ў сноў паразьзі 2 – час паэтаў і крыж званароў. Ён цягнуўся рукой зь нябыту дзе званарня яго стаіць, ён крычаў, што жывы, нібыта ён са мною хацеў званіць!..
|
3 «Ты ня бойся... – сказаў ціхутка голас, што апрытоміў мяне, – бо жыцьцё, як і сьмерць, так хутка нас на яве ня зможа – ты ў сьне!..» Я вярнуўся зноў да кватэры – да пакойчыка гаспадара... Твар яго ў хімерычным ашчэры з тою ўсьмешкаю, бы ў званара!.. А ў тужлівых вачох – дзьве званіцы: на адной – Бог мой! – долу крыжы! - перад сьмерцю яна будзе сьніцца, будзе сьніцца, пакуль буду жыць. Дзе крыжам быць на тых званіцах – колы чорныя на другой! – на тых колах мне век круціцца, як зьмяя, як вужака, ізгой. Ён сказаў: «Маўчы!.. – адвярнуўся. – Вочы!..» Вочы прыкрыў рукой. «Я хачу каб ты схамянуўся: там, дзе лой, ты чужы, ня свой. Вырачэнец між бруду, – ты мой!» Я жагнуўся, я зьбег – жахнуўся, адцураўся званіц і званоў... Ды зь люстэрка мяне крануўся званаровы той позірк наноў: замяні ці вярні сыноў!.. замяні ці вярні сыноў!
|
4 Дзьве званіцы са зрэнкаў маіх, дзьве званіцы з маіх вачэй, боль ня сьцішыўся, гук ня сьціх – аглушае душу!.. Хутчэй!.. I пагляд званаровы – ня мой, і пагляд званара ўва мне... Я – лязо да вачэй!!! Ён: «Ты стой!..» – Крок зь люстэрка – мяне кране!.. Закруціў заламаў мне руку, з пальцаў выпала звонка лязо... Па шчацэ, як вада на муку, пракацілася белай сьлязой неабранасьць - схаваны адчай... «Мой абраны, мне не выбачай, я пакіну цябе, я з табой, ты ня мой між чужых, ты ня мой...»
|
5 Я ня бачыў, як плача ён, – ён зь нябыту прыйшоў сюды – мой званар, мой паэт, мой праклён - ён падмануў клады, звышсуды, каб сваё рамяство перадаць, каб мастацтвам сваім перажыць і сябе, і людзей, і крыжы, каб вячыцца, а не гадаць.
|
6 Я прымаю твой позірк, званар, я прымаю, званар, твой пагляд. Гэта ганьба мая – мой рай!.. З долам! Зь небам! За далягляд!.. Спачывай, мой званар, не зманю! Не забудуся - не заб’ю!.. У званіцу тваю і маю я званю, я званю... Я званю!..
|
7 Ён сышоў, не пад шкло – пад б ы л о, дзе сьляпога сьвітаньня сьвятло, дзе абранасьці сутнай сіло, дзе буслова сівое крыло...
|
8 У скроні кроў і па венах кроў: ён званар... я званар... ён ізноў!.. Словаблуды, адступцы, прэч! Не пярэч мне, сьвятар, не пярэч, проста-проста: душа – ня рэч – аддасі, як тавар, – і дамоў!.. Не чакаю я новых стрэч, Мой званар, мой званар, мой ізноў!..
|
9 Нада мною да скону званы, як сьсівелыя кажаны, будуць плакаць і будуць крычаць – званароў і паэтаў гукаць!..
|
|
|
|