РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Марыйка Мартысевіч
Даведка
Кантэкстны тлумачальны слоўнік
Цмокі лятуць на нераст
 
Эсэ ў вершах і прозе
0. Прыгажосьць – гэта...
I. Фрынас
1. Бег, альбо Нацыя эмігрантаў
II. Сьвіцязянка
2. Bronik As We Love Him
III. Barbara Radziwil’s LiveJournal
3. Хадзем са мной
IV. Comme il faut
4. Частка і цэлае
V. Яна і яно
5. Пашлі мяне па-беларуску
VI. Памежныя гісторыі
6. Палеская хроніка
VII. Сястра Зоя і канец сьвету
7. Мае беларусіцы
VIII. І маці іх Сафія
8. Мужчыны, якіх мы выбіраем
IX.
0. ПРЫГАЖОСЬЦЬ – ГЭТА...
0
ПРЫГАЖОСЬЦЬ – ГЭТА...
        
        У тую пятніцу да звычайнага шэрагу рэчаў, што зьзялі ў ультрафіялеце танцполу –
        
         белай вопраткі,
         штучных караляў
         і ўсьмешак мурынаў –
        
        дадаліся ейныя сьлёзы.
        Спэцыялісты, прысутныя ў той момант у найлепшым начным клюбе аднаго з буйных адміністрацыйных цэнтраў Усходняй Польшчы, нават паспрачаліся аб прыродзе гэтага рэчыва:
        
        – Гэта кумыс, – сказаў асьпірант Эўразійскага гуманітарнага ўнівэрсытэту імя Л. М. Гумілёва (Астана, Казахстан);
        – Гэта спэрма, – сказаў вядомы польскі порнафатограф Кшыштаф Паняводзкі;
        – Гэта колгейт, – сказаў фотагенічны стаматоляг з Гомеля;
        – Гэта жомчуг, – сказаў Тубі, нырэц з абтоку Шры-Ланка.
        
        Гэтыя чацьвёра былі ўдзельнікамі ІІІ міжнароднай канфэрэнцыі эстэтаў і прайдзісьветаў. У гэтым годзе канфэрэнцыя мела назву “Чым ёсьць прыгажосьць?” і была прысьвечаная 80-годзьдзю з дня нараджэньня Мэрылін Манро. Паводле задумы арганізатараў,
        
        першы дзень канфэрэнцыі праходзіў у Чорнай сынагозе, помніку гатычнай архітэктуры XIII стагодзьдзя;
        другі дзень канфэрэнцыі праходзіў у Цэнтральнай гарадзкой бібліятэцы імя Адама Міцкевіча;
        трэці дзень канфэрэнцыі праходзіў у падворку драўлянага дамка бацькоў аднаго з арганізатараў.
        
        Паводле задумы арганізатараў, усе гэтыя будынкі былі вельмі прыгожыя.
        
        – Прыгажосьць – гэта калі мама прыходзіць з працы, і блякнуць зоркі сусьвету, і ня ведаюць, ці застацца, – сказаў падчас свайго выступу Тубі, сірата.
        – Прыгажосьць – гэта незалежнасьць, – сказаў, адказваючы на пытаньне, порнафатограф Кшыштаф Паняводзкі, дысыдэнт.
        – Прыгажосьць – гэта гета, гэта вочы габрэйскіх дзяўчат з агату, гэта многа апалягетаў Цыёну і Б-га багата, – сказаў падчас кофі-брэйку стаматоляг з Гомеля, грамадзянін Ізраілю.
        – Прыгажосьць – гэта, – сказаў асьпірант Эўразійскага ўнівэрсытэту, дасьледнік Льва Гумілёва, падчас вечарынкі ў клюбе, паказваючы на ейныя сьлёзы.
        
        У тую пятніцу да звычайнага шэрагу рэчаў, што зьзялі ў ультрафіялеце танцполу, дадаліся ейныя сьлёзы. Спэцыялісты нават паспрачаліся аб прыродзе гэтага рэчыва. І толькі дамавікі, у 24 гадзіны выселеныя спэцназам з д’юці-фры, ліквідаваных на ўсіх аўтамабільных і чыгуначных прапускных пунктах на ўсходняй мяжы Эўразьвязу,
        дамавікі, што раней папраўлялі пустышкі ў сьне афіцэрскім дзецям на пагранзаставах,
        дамавікі, што, чакаючы далейшых загадаў начальства зьнізу, пакуль падпрацоўвалі тут, прыбіраючы пасьля вечарынак,
        дамавікі, што асьцярожна лізалі ейныя шчокі, калі ніхто ня бачыў, –
        ведалі:
        гэта быў бэйліс, чысты ірляндзкі бэйліс.
        
        Нават Ісус устрымаўся казаць Пілату, у чым ёсьць ісьціна.
        Заграб, Скоп’е, Белград, Падгорыца. Любляна, Сараева, Прышціна.

Падабаецца     Не падабаецца
2009–2022. Беларусь, Менск.