|
Ci ty ŭzojdzieš kałi, sonca?
|
Z płačam dumka-pieśnia ljecca
Pa zamučanaj staroncy,
Z płačam recha adabjecca...
Ci ty ŭzojdzieš kałi, sonca?
Maci-ŭdoŭka, siracinka
Pahladajuć u akonca, –
Dahareła ŭžo łučynka...
Ci ty ŭzojdzieš kałi, sonca?
Pchniecca ściežkaj padarožny, -
Niama chleba ŭžo ŭ katomcy, –
Cel daloka, zbłudzić možna..
Ci ty ŭzojdzieš kałi, sonca?
Mužyk z horam laža, ŭstanie,
Placie bajki dzietkam, žoncy,
Tolki čutny uzdychańni...
Ci ty ŭzojdzieš kałi, sonca?
Šnur biadak pachaŭ da potu, –
Marny ž kołas na sałomcy, –
Ni krasy toj, ni ŭmałotu...
Ci ty ŭzojdzieš kałi, sonca?
Bieźziamielny zhubiŭ dolu,
Choć šukaj ź biady ŭ pałoncy;
Ni toj chaty, ani pola...
Ci ty ŭzojdzieš kałi, sonca?
Puty, katarhi, astrohi,
Sibir poŭnaja biaskonca;
Ni toj praŭdy, ni darohi...
Ci ty ŭzojdzieš kałi, sonca?
Z płačam dumka-pieśnia ljecca
Pa zamučanaj staroncy,
Z płačam recha adabjecca...
Ci ty ŭzojdzieš kałi, sonca?
– Ci ty ŭzojdzieš?
[1906–1909]
|
|
