Зьявіся, любая, прымройся
На сьветлы дзень, як цудадзіў, -
Такой, як бачыць давялося,
Калі з табою я хадзіў
У гай сасновы, у гушчары,
На бераг Сьвіслачы-ракі.
Каханьня казачныя чары
Табе вязалі касьнікі.
Мы абяцалі. Мы чакалі.
А ўсё гусьцей плыла імгла...
Каго шукалі - ашукалі,
Між намі прорва пралягла.
I - чвэрць стагодзьдзя. Мне здалося,
Я памяць зноў разьверадзіў...
Зьявіся, любая, прымройся
На сьветлы дзень, як цудадзіў.
|
|
