Гальлё панадна разлапушыў За хатай прадзедавай сад; Чарэшні, яблыні і грушы Сышліся згодліва у рад. Ківаюць макаўкамі ўдала, Плывуць напевы ад галін, Як бы зь іх кожная ўзывала: «Хадзі, бяспутнік, адпачынь! Хадзі, усядзься каля нас ты, Жыцьця прыгод забудзь напасьць, Паслухай музыкі лісьцястай: Яна табе гарт новы дасьць. Ты многа йшоў, блудзіў ты многа, – Жаданьня крыж ты нёс і нёс, Аж на расстайных стаў дарогах; Цяпер – да нас ад бур і сьлёз!..» Так быццам вабіць сад лісткамі Пад цень свой думку многа лет; А думка – што? яна зь вятрамі, Ня знай, за чым ляціць у сьвет...
[1911]
|
|