РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Якуб Колас
Вершы
Кантэкстны тлумачальны слоўнік
Ноч
Між палёў шырокіх
Я адзін стаю,
Ахваціла ціша
Ўсю душу маю.
 
Ночанька мая ты,
Водблеск глыбіні!
Ты душу чаруеш
Сьпевам цішыні.
 
Многа ў гэтым сьпеве
Водгукаў жывых,
Іх ня зловіш вухам,
Чуеш сэрцам іх.
 
Ночанька мая ты,
Ціхі сон вясны!
Колькі зор на небе!
Як блішчаць яны!
 
Водблескам пажару
Неба край гарыць –
Там двурогі месяц
Выплыў з-за гары.
 
Ночанька мая ты,
Ціхая дума!
Не ахваціш вокам,
I тых слоў няма
 
Апісаць твой вобраз,
Хараство, спакой –
Толькі ў цябе ўнікнеш
Чуткаю душой.
 
 
 
 
Падабаецца     Не падабаецца
2009–2022. Беларусь, Менск.