Дзесьці ў Крэве, на высокіх могілках, У буяньні руты і гарквы, У зямлі змаганай, ды ня зможанай, Дзед з бабуляй – тварам да царквы. Іх жыцьцё падманамі і звадамі Праплыло, як месяц па вадзе. I ляжаць Іван з Алімпіядаю... Дзе іх душы? Невядома дзе. У хмурынках тых вунь?.. У тумане?.. На губе крывінку прыкушу... Як твая душа, мой дзед Іване? Ці знайшла Алімпіну душу? Не збалела, крылы не намуліла Над царквой маўкліваю кружыць?.. Вымытай хусьцінкаю бабулінай Аблачынка сохне на крыжы.
|
|