Сонейка ў небе і вецер-гусьляр, Подзьмух ля ніваў вясновы. Ўсё гэта долі ласкавае дар, Як маці пяшчотныя словы. Продкі далі мне калісьці жыцьцё Ў Жлобаўцах ціхіх і мілых, Сэрцу з каханай зямлёю зьліцьцё Душы маёй сьмелыя крыльлі. Цьвілі мае вёсны – ў палёх васількі, У лёс мой ўрываліся буры, I сыпала сонца са шчодрай рукі Цяпло маёй дзіўнай натуры. Тысячагадовыя сказы зь сяла, Зьмястоўныя, творчыя словы, Не, неабыякавай доля была Да будучых сьцежак жыцьцёвых... Вось запяяць бы зямлі маёй гімн: – Зь няволі да слоў п'едэстала! Вартым, адвечным, да болю сваім, Як нэктарам, душа набрыняла. А доля народа, як цемрадзь сама, Каб змог, праглынуў бы нас вораг, I толькі каханьню граніцаў няма, Калі яно меч, не пакора! Словы, як стрэлы, і сэрца, як лук, Стыхіяй змаганьня напяты, Ня страшна пагрозаў, ні зьдзекаў, ні мук За сьвятасьць пакрыўджаных хатаў. Калі над пабоішчам кружыць арол I вогненна сэрца кахае, Дык сьмерць найдарожшых, пакрыўджаных боль Ва ўзьлёт барацьбы прарастае. О сэрца, мне ранаў Тваіх не зьлічыць, За вернасьць палём і дубровам, За тое, што слова маё не маўчыць У долі прыбоях суровых. За вернасьць шляхам, што Скарына праклаў, Да ўзвышшаў старому народу, За ўзровень належных зямлі маёй праў Стаю непахісна і горда! Адна супраць злыдняў бярозай стаю, Пот, ня сьлёзы, мой твар залівае. Я люблю Цябе, Край мой, як душу сваю. Я знаю – за гэта ўміраюць...
|
|