Вясеньняя ночка, Як стой, праляцела, I раніца зь неба Сплывае нясьмела. Сьвет яснасьці ўзмахам Пачаў дзянёк новы; Хаваюцца з страхам Начніцы і совы. Мільённая зорак Сямейка заснула, Праменьнямі сонца З усходу міргнула. Туман зь сенажацей Плыве, расьсяецца; Звон пута чуваці, Начлежнік пляцецца. Ад птушыных песень Лясы загудзелі, I лісьце, і травы Ад росаў зардзелі. Прачнуліся вёскі, Дым з комінаў вале; Асьверы, павозкі Скрыпяць недзе ў далі. А сонца ўсё вышай! Жыцьця ўсюды болей... Плугі і бароны Зашурхалі ў полі. Рыкае скацінка, Іграюць жалейкі; Над цэлай мясьцінай Стаіць гоман нейкі. Ўсё йграе й ззывае Да працы – аж міла... Куй, браце, жалеза, Пакуль не астыла!
[1906–1910]
|
|