Цёплы вечар. Ціха ўсюды. На заходзе сонца. Хмаркі захад чуць заслалі Тонкім валаконцам. Зьзяюць хмаркі ў пазалоце, Пажарам палаюць. За гарою ціха-ціха Песьні заміраюць. Выйшаў рольнік з хаты ў поле Ды па межах ходзіць, Каб пабачыць сваім вокам, Як Бог жыта родзіць. Твар сур’ёзны ў селяніна, Важны, задуменны, Ходзіць, рукі залажыўшы За той пас раменны. Леглі гожымі радамі Вузкія загоны, Апранула зямля-матка Кажушок зялёны. Густа жыта маладое Поле ўсё акрыла, Лапушное, сакаўное – Проста глянуць міла. Сям-там колас раскрывае Свой пучок зялёны, Дзе-нідзе ўжо яго вусік Блісьне на загонах. Селянін глядзіць з уцехай, Ходзячы ў тым дары... Так ні поп, ні ксёндз ня ходзяць Пры сваім алтары.
|
|