Пазьмятала даўно кволай жоўтай далоняй восень пену лістоўя з пажоўклых сьцяжын. Адцьвілі верасы, ад’ірдзеліся клёны, але ж трэба і сяньня змагацца і жыць! Кажны з нас яшчэ ж верыць у нешта сьвятое: хто ў Хрыста, хто у Край, а хто – проста ў сябе, і пад вейкамі смагі жыцьцёвай ня ўтоім мы, як нізка ні гнула б нам гора хрыбет. Варта жыць! Варта вечна чагось спадзявацца, чуцца часткай айчыны, малой а жывой, песьціць сьцерплыя пальцы адвечнаю працай, разьвіваць слоў і чынаў бясконцы сувой і тварыць... Заўтра ж зь неба зарою крамянай не зьляціць і ня выцьвіце з нэтраў зямлі. Наша заўтра народзіцца з нашага сяньня, з усяго, што нас цешыць і што нам баліць. Калі ж мо й давядзецца няўсьцішныя сэрцы йшчэ ці раз нам снапоўем злажыць на таку, – не бяда! Ўжо нікому наш сьлед не зацерці на гасьцінцах зямных, нашай сілы – ня скуць! Хай цьвітуць верасы, хай мядзяняцца клёны, хай мяцеляцца зімы над беляй сьцяжын. Нашу долю мы ймклівей за ветры здагонім, а для гэтага варта змагацца і жыць!
1943
|
|