Прысьвячаю пакліканым і непаклітным крытыкам
Ня так лёгка гаркою, агорклай агудай змусіць нашыя вершы навечна заплесьнець. Яшчэ доўга блукаць па гасьцінцах мы будзем, раздаваць пакрысе свае сэрцы у песьнях. Ці адна яшчэ ў сьвеце вясна у далоні нам ружовых вішнёвых пялёсткаў насыпле. Ці ў адзін яшчэ верасень залатаклённы мы душою і сэрцам трывожным уліпнем? Ці ня ўдосыць наплачамся мы па краіне, аж уздымем у песьнях яе на узвышшы, ці ня раз непаэты апырскваць сьлінай будуць нас або й славай ахутваць пышнай? Ды хай вусны праклёнамі ў раны калечаць ці хвалой захлынаюцца крытыкі сьвету, – што нам іхнае ройна-шумлівае веча? Не забраць ім ні неба, ні сонца ў паэтаў. Ані неба, ні сонца, ні сьлёз, ні усьмешак, ні ўсяго, што нам кажа успыхваць і гаснуць. Тут, у сьвеце злачынным, у сьвеце бязгрэшным, не яны – мы аднойдзем няўлоўнае шчасьце!
1944
|
|