РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Натальля Арсеньнева
Вершы
Кантэкстны тлумачальны слоўнік
Мэлёдыя
Нат места ноч прыцішыла...
                                                              Так гулка
мой крок зьвініць у ночнай цішыні.
Набраклі песьнямі за дзень пляцы й завулкі
ці мо душа мая?
                                  Ліловы змрок зьвініць.
Адно я не злаўлю мэлёдыю мяккую,
што апляла мяне і пахне, як трава,
і сьвечкі каштаноў, і сіні бэз...
                                                                  Такую
вясновую у месьце не сарваць,
ня стрэсьці з галіны мястовых пыльных клёнаў,
з каменных ходзішчаў пад імі не падняць.
Мо з паплавоў сюды прыйшла яна зялёных,
адтуль, адкуль і я, і гэтая вясна?
Зьвініць мэлёдыя...
                                          Калышуць цішу тоны,
пяе ўсё аб вясьне ліловы змрок.
I гукі места ў ёй, непераможнай, тонуць.
Чуваць адно яе і мой упарты крок.
 
1950–1952
 
 
 
 
Падабаецца     Не падабаецца
2009–2020. Беларусь, Менск.