Вось і яшчэ адну восень я адвітала, у цішы, сэрцам і целам з каменьня. Тутка па ёй не галосіць ані прадоньне, ні ўзвышшы, ані суддзя наш найвышшы – наша дзіўное сумленьне. Тут залатую хаваюць моўчкі, ледзь першы жаўтавы ліст залунае над мурам, зычаць нябожчыцы раю, хрыплагалоса гугнявяць, сьвечкі таненькія ставяць, місы з сытою ды журам... Плач ці ня плач – не паможаш, клёнаў назад не адзенеш, дзён залатых не ссукаеш, сіверу не адварожыш, сэрцаў людскіх не адменіш, як ні выцягваеш жмені, – праўда ўжо скрозь такая. Зраніш адно, навярэдзіш пальцы, і пясьці, і рукі у неразумным змаганьні. Вось я шнур пацерак зь медзі з шыі зьняла без прынукі: хай нас асеньняй дакукай не харашаць і ня раняць.
1963
|
|