Я выходжу нараньні на места з ношкай, сіняй такой, за плячыма (гэта сны, недасьнёныя сяньня). Напярэймы бягуць мне завулкі, сьпехам гасячы ночныя сьвётлы, і ўстае над засьмечаным брукам зігатлівая, тут нават, восень. Мне чутно, як пад таннай апраткай сэрца стукае, бачу, як рукі – вёслы горнуць сівое паветра, чую крокі важкія, хай сьледу на вільготным пяску не дагледжу. Што ж, няхай прамінае бясьсьледна йшчэ адна, зноўку жоўтая, восень. Я ж іду ля тых самых будынін, я ж тапчу тыя самыя пліты камянёў, цагліны ды асфальту, што й заўжды – і ў дажын, і увесну... А што клён залатых завушнічак начапляў ды што звоняць а звоняць, – дык на тое ж і восень... Мне рупіць – ці яшчэ адна, гэткая, будзе для мяне, для жывое – жывая.
1963
|
|