Ўсё жыцьцё ён зьбіраў дыяменты народныя Па шляхах Беларусі і ў сьпёку і ў сьцюжу, Ўсё жыцьцё яго сэрца высакароднае Працавала няўтомна і білась напружана. Ў гуках злоўленай песьні жыло незвычайнае: Шчасьце новых гадоў над Радзімаю мілай, Сьпеў жалейкі над рэчкаю, гукі адчаю, – Ўсё, чым людскае сэрца вякамі жывілася. Песьні сытых дажынак у жнівеньскім садзе, Кліч купальскіх агнёў здалёку і зблізку, Песьні жніўных палёў, песьні гора і радасьці, Песьні маці над першай дзіцячай калыскаю. І не штучнаю кветкай, а кветкай сапраўднаю, Не ў паперы, а ў гуках, дарагіх і любімых, Ўстала песьня народу простай, як праўда, І такою вялікай, як гэта магчыма. Ціха ў зале. І твар яго думкай асьвечаны. Кажа ён пра фальклёру адценьні і фарбы, Кажа нам пра жыцьцё, што адному прысьвечана – Зьбераганьню народных, нязьлічаных скарбаў. «Піце з чыстай крыніцы, з напеваў матчыных, Сьцеражыцеся, хлопцы, частушкі таннай, Паважайце, любіце бацькоўскую спадчыну – Ўсё сплыве, а легенда і песьня застанецца». Хай не ўсё у жыцьці так як сьлед атрымалася, Памятайце, настаўнік, што слова плённае Як зярнятка на добрую глебу ўпала, І у сэрцах юнацкіх зарунела, зялёнае. Шмат яшчэ спадкаёмцаў вам трэба выкаваць. Будзе шлях пераможным, слаўным, бяскрайнім. На вялікія справы – і сэрца вялікае, На вялікае сэрца – і лёс надзвычайны.
1955
|
|