«Хлопча мой, мы ніколі ня будзем з табой Блукаць па сьвежай траве: Адгрымеў і забыўся далёкі бой, А асколак пад сэрцам жыве. Каля сэрца, ў цёплай сумцы яго – Ён лічыць кожны удар. Мне шкода, мне шкода шчасьця твайго, Абарваных жалезам мар». Так сказала яна. І голас мой Абарваўся ад чорнай тугі... Ты сьвецік мой, ты званочак мой. Ты клёнік мой дарагі. О, вайна, акопны смурод баёў, О, адроддзе пекла і зла, Нават мёртвай – ты зьнішчыла шчасьце маё, Нават здохлай – гора дала! Чорны цень твой на кволых дзяўчынак упаў, Ўсё забіў, запаскудзіў вакол. Прыбіць бы, сволач, цябе да слупа І ў глотку асінавы кол! Не трэба, каб золкі спусьціўся туман. Паўстань, пераможны дзень. Для каханьня майго заслоны няма. Я хачу. І адступіць цень. І цябе з тваёю мужнай тугой Сагрэе мая рука, І асколак ты выплачаш з сэрца свайго, Як выплакаў казачны Кай. Не трэба, не трэба сумных вачэй, Не трэба пакут і няўдач. Не трэба, не трэба сагнутых плячэй. Любая, сьветлая, плач. Як царэўна плача, як сонца праз дождж, Як расы ружавеючай дым, – І адступіць боль, і апусьціцца нож, Узьняты над сэрцам маім. Я вып'ю сьлёз тваіх цёплую соль, Я згару на тваім агні. Ты чуеш? Сталь тае, сплывае, як боль, Ад каханьня, ад цеплыні. Любая, сэрца маё не трывож. Што гэта? Ў сьне ці не ў сьне?.. Сьлёзы, сьлёзы, сярэбраны дождж, Ад якога кветкам квітнець. У радасьці яснай за нас з табой На нябёсах нап'юцца багі. Ты месячык мой, гномік мой, Ты – жаўранак мой дарагі.
31.Х.1959.
|
|