Пахіліўся дуб да дуба Ды бурчыць, гамоне: – Што-та вецер вельмі груба Загуляў сягоньня! Паглядзі, сусед, на пушчу, Як трашчаць галіны, – Там у самую ўжо гушчу Вецер сілы кінуў! Вунь, прымець, старуха-хвойка Сскочыла з карэньня, А вунь там зь бярозы бойкай Валіцца паленьне. Пакацілася удоўжкі І асіна-сваці... Фу, ты! аж мяне у дрожкі Пачало кідаці!.. Што? Ня ўстояла і ліпа – Рухнула, бядачка!.. Ці ж быць можа? Ўжо захліпаў I стары твой бацька. Ах! што гэта?.. Праз узгоркі.. Ці ж то к нам?.. Ой, ногі I, ня скончыўшы гаворкі, Рынуў дуб, як доўгі.
1918
|
|