РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Янка Золак
Вершы
Кантэкстны тлумачальны слоўнік
Краіне
Мілая Маці-Краіна,
Любая сэрцу да сьлёз!
Плакалі мы, што ты гінеш,
Бачылі чорны твой лёс.
 
Доўга жыла ты ў прыгоне,
Гора цярпела і зьдзек...
Верылі мы: не заслоняць
Хмары твой сонечны дзень.
 
Верылі: зьнікнуць напасьці,
Што навісаюць гурбой,
Кветка Купальская шчасьця
Будзе цьвісьці прад табой.
 
Час прамінуў... Нашы путы
Зьбіты магутнай рукой.
Верым душою раскутай:
Прыйдзе і к нам супакой.
 
З радасьцю, з гордасьцю бачу:
Зьнік з тваіх вочаў дакор;
Зь вераю моцнай ва ўдачу,
Тчэш сваіх дзён чантыкор.
 
Мілая Маці-Краіна,
Любая сэрцу да сьлёз!
Знаю, што ты не загінеш;
Сэрцам я чую твой лёс.
 
27.IX.1942 г.
 
 
 
 
Падабаецца     Не падабаецца
2009–2020. Беларусь, Менск.