Staim my pierad budučyniaj našaj I ŭsio varožym, sočym jejny chod... Ci ŭskreśniem my z dušoj, ŭpaŭšaj, źviaŭšaj, Kab vyjści ŭ śviet, jak niejki zdolny rod... Siahońnia my žyviom, i ŭdzień my błudzim Pad maskaj, aślaplajučaju nas, I što skazać samim sabie i ludziam, Nia viedajem, nia možam, choć i čas. Zacisnuty, zadušany, jak myšy Pad žorstkim vienikam, z usich bakoŭ, Šukajem, jak ślapyja, nie zhubiŭšy Taho svajho, što naša ad viakoŭ. Pakryŭlenyja kołiś našy dušy Dahetul vyprastać nia ŭ mocy jšče; Snujomsia, ŭ dumkach zvodnych zatanuŭšy, A chtoś, a štoś i mučyć i piače. Ciabie čakajem, budučyni niejkaj, Što pryjdzieš, niedzie ŭsich nas paviadzieš, I hiniem marna pad čužoj apiekaj, Adbiŭšysia ad rodnych viechaŭ, miež. A chtoś daloki ci chtoś, moža, błizki Zasieŭ za naš biasiedny, sytny stoł I kidaje, jak z łaski, nam ahryzki, A my k ziamłi z padziakaj hniomsia ŭpoł. Niavolnictva j žabractva tak nas źjeła I tak nam vysmaktała z serca sok, Što nat u vočy hlanuć, plunuć śmieła Nia śmiejem, stoptanyja na piasok. Tam čutna: Biełaruś! Tam – Niezaležnaść! A tam – «Paŭstań, praklaćciem»... Nu, a my? My ŭ strachu... dum krutnia... raźbiežnać... Biaz tołku kryllem chłopajem, jak ćmy. O tak, jak ćmy, jak spudžany varony!.. I słuchajem, i niuchajem tut, tam: Jaki paviejaŭ viecier na zahony, – Zachodni, ŭschodni, j ci ad nas, ci k nam? Ahrablenyja z honaru j kašułi, Z svajho prypynu vyhnanyja von, My dziakujem, što torby apranułi Na nas dy z našych nitak-vałakon. Z kijkom žabračym tak my, paŭnaletki, Brydziom, paŭziom u śviet – skroź nieŭpapad. I prysiahajem, kłičam Boha ŭ śviedki, Što my – nia my, što niechta vinavat... I tak žyviom, siabie samich nia znaŭšy, Učora, siońnia łazim miž kanaŭ... Niaŭžo ž by chto j nad budučyniaj našaj Naviek załom praklaty załamaŭ? Niaŭžo nas nie abjaśnić rozum jasny I nie pakiniem bicca z kuta ŭ kut? Niaŭžo kłič viečny budzie ŭ nas naprasny – Kłič burałomny: vyzvaleńnie z put?!
1922
|
|