РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі      Гасьцёўня      Спасылкі      Аб сайце       Кірыліца      Łacinka    
Янка Купала
Вершы
Кантэкстны тлумачальны слоўнік
Няма грошы
Кожны гэта пэўна скеміў,
Што ня ўсё ў нас так, як трэба,
А ня лжэ і біты ў цемя,
Што і сходзіць ня ўсё зь неба.
      Ёсьць на ўсё прыпеў харошы:
      «Трэба грошы – няма грошы!»
 
*

Шнур у Сьцёпкі штось вузіцца...
Дзеці... Крута з хлебам, з сольлю;
Б’ецца, рвецца, не ляніцца;
Эх! каб так, ды ніўкі болей!
      А адсюль прыпеў харошы:
      «Трэба грошы – няма грошы!»
 
*

Дзеці вырасьлі ў Сьцяпана;
Чуў, ёсьць школы, ёсьць навука.
Добра ўзяць прымер ад пана...
Ці ж то ўчыцца вельмі штука?
      А тут зноў прыпеў харошы:
      «Трэба грошы – няма грошы!»
 
*

Жэніць сына, хрысьце ўнука, –
Пойдзе з просьбай к пану, к «чыну»...
Посьле працы, посьле мукаў
Адпачыў бы сам часіну...
      А зусюль прыпеў харошы:
      «Трэба грошы – няма грошы!»
 
*

Жонка штось ня выйдзе з хаткі:
Зьлегла, крэкча і... ўмірае;
Цісьне стараста падаткі;
Фэльчар, поп, – бяда такая!
      Аж тут на, прыпеў харошы:
      «Трэба грошы – і ёсьць грошы!»
 
[1922]
 
 
 
 
Падабаецца     Не падабаецца Водгукі
2009–2019. Беларусь, Менск.