Да году год, Да бяды бяда Зьбіраюцца ў гурт адзіны. I сьветлай і шарай гадзіны, I кожнай пыліны з быліны Мінулых часін Шкада. Шкада, Што стала цяжкой хада, Якая намеры мела Дайсьці да ісьціны сьмела. Шкада, Што зьнікла з крыніц вада, Адкуль напіцца душа хацела, Але душу задушыла цела. Шкада, Што выпаў падлётак з гнязда, Якому ўзьляцець карцела, А сьцежка ў неба круцела. Шкада, Што засталася жуда Адной гаспадыняй надзелу, Дзе чорная ноч падаўжэла I з торбай прыйшла Каляда.
|
|