Успамін пра Ўладзімера Караткевіча
|
Пад час свайго зямнога вандраваньня Ты не любіў дакладнасьці адной: Дзе нарадзіўся. Вечнасьць тая пані, Што стане да пакутніка сьпіной I ўсе яму паказвае разлогі, Дзе сьпіць сабе Гадоў наступных гром. Ты нарадзіўся там, Дзе ўсе дарогі Сышліся, Каб абнашчыцца Дняпром. Ты весела сьцьвярджаў – Іван Кабыла, Зь якога дом Раманавых пайшоў, Быў конюхам у дзеда люба-міла. Твая радня царам чалом ня біла, Пагоняй гнала, Біла прыбышоў. Ты верны рыцар Слоў крывіцкіх, гойных, Якія не загубяцца нідзе. Твой цень відушчы Па забытых гонях Ідзе I за сабой сьляпых вядзе.
|
|