Як у сьцюдзёную раку, Памалу ў Біблію заходжу, Бо веру, што душу злагоджу, І, думаю, бяду ўраку. Плыве ўладарыста рака, Разьвітваецца зь берагамі. І змарнаваных дзён пэргамэнт Жаўцее ў крылах ветрака. Ніякавее парахня, У прах ператварыўшы порах. Глушэе боль, Маўчыць брахня, І страх не варухнецца ў норах. Сьвяжэе потых сівярка, Чужэе цесната людская. Душу спакоем абмывае, Як сьвет, глыбокая рака.
|
|