Не дары асеньніх васількоў, Не дары мне красак на хвіліну, Не тваю трыццатую любоў Панясу з сабой у дамавіну, Не дары адцьвіўшых васількоў. Не цалуй мне вусны на разлуку (Не хачу я, любая, маніць), Я аддаў шчырэйшым пацалункам Дарагія дальнія агні, Цалаваць ня трэба на разлуку. Не каханьне томнае нясу Я цяпер жыцьцёвай пуцявінай, А жывую палкую вясну Маладой абуджанай краіне... Не каханьне томнае нясу. Не дары таго, што не прашу, Не дары мне красак на хвіліну, Я знайшоў другую пуцявіну, Я аддаў ёй сэрца і душу, Не дары мне красак на хвіліну.
|
|