Гарбаты цень старэнькай на сьцяне Нібы вартуе дарагую памяць. Бяз думак хочацца ёй так аледзянець, Альбо наўзрыд заплакаць. Палохае і вабіць кожны шум, I нават выраз чорнае паліцы. Малітвай хочацца ёй прымірыць душу, Ды надаела зрэшты і маліцца. Маўчыць глухое неба, як труна, А на зямлі?.. Зямлі няма спакою... Вакол, вакол, здаецца ёй, мана Аледзенела чорнаю расою. За вокнамі трывожна на мурог Губляе лісьце горкая асіна... Сягоньня белыя у маці на вачох Забілі дарагога сына. – О, сын мой, сын мой, За чые грахі Нас дамавіна сёньня разлучыла? О, я запомніла яго шляхі! О, я заўважыла яго злачынцу!.. Перачакаўшы сьветлую зару, Як будуць туманы на сонцы грэцца, Яму сама я грудзі разарву, Вужачае дастану сэрца. Блудзілі здані ў цемені начной, Дрыжэла лісьце, падала бязьсільна... I... Раптам стук у сенцах... Перад ёй Паранены злачынца на насілках. Халодны момант... Потым крык душы, О, крык трагічны матчынага жалю Нямыя сьцены хаты аглушыў, I аглушыў азмрочаныя далі... ...А праз гадзіну да яго павек Яна кранулася упоцем: – I ты ж, сынок, таксама чалавек, I ты ня вырас на балоце.
|
|