РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Франьцішак Багушэвіч
Вершы
Кантэкстны тлумачальны слоўнік
Яснавяльможнай пані Арэшчысе
Гдзе ж нам парывацца –
З мудрымі раўняцца:
Чэсьць аддаць Аўторцы
У простай гаворцы!
 
Не, ня чэсьць, то мала –
Славу сваім трудам
Сама ты зьяднала!..
Ты з пальмай прад людам.
 
Шмат ксёнжак пісалі
Не аб нашым браце:
Лепш чужых пазналі,
Як у сваёй хаце;
 
А нас, подлых кмеці,
Міналі здалёка
I хавалі дзеці
Ад нашага вока.
 
А Ты, пані, сьмела
Заглянула ў хату,
Усё зразумела
I нашаму брату
 
Працягнула руку
I сэрцам балела,
Глядзеўшы на муку,
I пяром умела
 
Выліць смутак гэты, –
Што аж душа рвецца,
Што плачуць кабеты,
Ня знаюць, гдзе дзецца!
 
Чым жа мы аддзячым?
Што ж мы напрыносім? –
Хіба што заплачым
Ды Бога папросім:
 
Прымі ж нашу дзяку
У малітве, ў сьлёзцы,
Прымі як азнаку
Тваёй славы ў вёсцы.
 
 
 
 
Падабаецца     Не падабаецца
2009–2019. Беларусь, Менск.