Ты слухай-паслухай,
Таварыш і брат:
Заўсёды наперад!
Ніколі назад!
Глядзі – во імчыцца –
Жыцьцю напралом –
Па полі, па пушчы
Віхор-буралом.
Як віхры, машыны
Бягуць па зямлі;
Па моры па сінім
Плывуць караблі.
У моры, ў азёры,
Палошчучы муць,
Крыніцы і рэкі
Цякуць і цякуць.
Арлы-самалёты
Сьвідруюць прастор
Ня знаючы ў лёце
Ні меж, ні разор.
Заўсёды наперад!
Ніколі назад!
∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙
Во гэтак, няйначай,
Таварыш і брат!
1931
|
|
