|
Каханьня сад і ластаўка вясны
|
I дождж, і гром, і несьціханы вецер,
I першы клейкі лісьцік выразны!
...Абуджваюць балючае дасьвецьце
Каханьня сад і ластаўка вясны.
Яшчэ з табой мы павяснуем, доля,
Бо соты раз, як позва адкрыцьця, –
У сьветлыні агромленага гольля
Каханьня май і ластаўка жыцьця.
Вясна, агонь зялёнага азарту,
Люблю твайго размаху крыгаход...
Зялёны сад – ён стане жоўтым заўтра,
Але нальецца тайнай сілай плод!
Аціхне шум. Ацяжалее крона.
Ды зноў успыхне лісьцік выразны.
I блаславіць нашчадак акрылёна
Каханьня сад і ластаўку вясны.
|
|
