Калі змагла б, вярнула б я ня слова: Адзін прамень – зямлёй і небам між. Мой ясны сьвет, зялёная дуброва, Ты ўсё шуміш, ты ўсё яшчэ шуміш. Адзін прамень! Яго шукаюць рукі Аблокамі і кручаю паміж. Зялёны ліст нясьцерпнае разлукі, А ты зьвініш. Ты ўсё яшчэ зьвініш. Шукае смага ў працы паратунку, А дзень з гары ляціць, як пара лыж, Крыжасты шлях сумненьняў і лятункаў, Чым далей, боль, – мацьней яшчэ баліш! Адкрыты дням і снам трывожным вочы, Дзе так нацята стоеная ціш!.. Страла, што паўзь мяне прайшла аднойчы, Ты ўсё ляціш, ты ўсё яшчэ ляціш.
|
|