Помню Прагу, вясьняныя сьвяты. Адхіляючы цюль ад акна, з поўнай чарай, да сонца паднятай, я стаю ў задуме адна. І пад шум дарагіх лімузынаў, галаву адкланіўшы назад, п'ю за нівы, лясы і даліны, п'ю за шчасьце пакінутых хат. Задрыжэла крыштальная чара, сэрца болем туга заліла. Беларусь дарагая, ня дарам я Табе свае дні аддала. Сёньня ў думках Цябе я вітаю, п'ю салодкую чару віна. Можа заўтра бяз скарг, дарагая, за Цябе вып'ю горыч да дна. Поўнач. Сьцюжа. Вясьняныя сьвяты. Церазь бераг аж пеніцца боль. Прада мною кірка і лапата, але думы заўсёды з Табой. Жоўць спаліла мне горыччу вусны, але чара ня падае з рук. За здароўе сваёй Беларусі я яе ўздымаю ўгару. Як калісьці сьвятое прычасьце зь яснай чары ля царскіх варот, п'ю свой боль, як вялікае шчасьце, за каханы крывіцкі народ.
1954
|
|