РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Якуб Колас
Вершы
Кантэкстны тлумачальны слоўнік
Ворагам
Багачы і панства,
Нашы «дабрадзеі»!
Мы на суд вас клічам,
Каты вы, зладзеі!
 
I на грозных межах
Часаў пераходных
Сьмела вас пытаем,
Прагных і нягодных:
 
«Чыімі рукамі
Вы дабро зьбіралі?
На чые вы сьлёзы
Дабрабыт куплялі?
 
I за што, скажэце,
Палкамі нас білі,
Секлі-катавалі,
Голадам марылі?
 
Ласкаю ж чыёю
I з чые вы працы
Замкі збудавалі,
Пышныя палацы?
 
Ўсё ад нас забралі,
А што нам далі вы?
Чые нудна ў полі
Так марнеюць нівы?
 
Вузенькаю ніцьцю
Чые йдуць палоскі?
У чыім то жыце
Многа так бярозкі?
 
Каму адвялі вы
Пусташы, каменьне?
Хто з свайго засеву
Не зьбярэ насеньня?
 
Чые гумны, хаты
Гнуцца сіратою?
Чые сьлёзы льюцца
Кожнаю парою?
 
I чыя скацінка
Сохне ў пустым полі?
I як гаспадар той
Гіне у няволі?
 
Чыя песьня-скарга
Ў неба йдізе дакорам,
К месяцу, і сонцу,
I к далёкім зорам?»
 
Багачы, і панства,
I ўсе вы брадзягі!
Ўбок з дарогі, каты!
Бойцеся сярмягі!
 
Ўжо даўно вяроўкі
Вас, паны, чакаюць,
I па вас асіны
Сьлёзы праліваюць.
 
1906
 
 
 
 
Падабаецца     Не падабаецца
2009–2022. Беларусь, Менск.