З узгорка ў лагчынку дарожка зьбягае. Дубы наабапал стаяць. А хвалі крынічныя – хто іх там знае – Аб чымся, знаць, важным шумяць, І хвоі-суседкі, і смутныя ёлкі, Бы ўдовы, стаўпіліся тут: Даведацца хочуць і травы, і зёлкі Навін, што прыйшлі ў гэты кут. І ўсе неспакойны, і ўсе засмучоны, Бы нечага боязна ўсім, А вецер-задзіра гудзе, як шалёны, І вые над лесам пустым. Хвалююцца дрэвы, а красачкі ў скрусе Зямлі адбіваюць паклон. «Ня бойцеся, – зь неба гукаюць ім гусі, – Ня вечны зімовы палон...» З узгорка ў лагчыну шыбуе дарога, Стаяць наабапал дубы. Між дрэваў і красак пануе трывога, І цені снуюцца журбы.
1914
|
|