|
Песьня на сон у бяссоньне
|
Вецер сьцішыўся ў бары,
Сьпі, Якубе, сьпі, стары!
Тут няма жывой душы,
Сам сябе ты калышы.
Па-над рэчкай дрэмле дуб,
Задрамлі і ты, Якуб!
Выбег зайчык з-пад дуба,
Люлі, люлі Якуба!
Сьціхла, змоўкла дарога,
Люлі, люлі старога!
Выплыў месяц-чараўнік,
Вырас чорны баравік.
Сьпі, Якубе, лысы дзед,
Пойдзеш заўтра ў лес чуць сьвет,
Прыйдзеш і наверняка
Знойдзеш там баравіка.
Выбег зайчык з-пад дуба,
Люлі, люлі Якуба!
Мне грозіць пальцам строга,
Люлі, люлі старога!
Ляж на правы бок, зяхні,
Кінь ты клопат і засьні!
Няхай сьняцца табе сны,
Тыя сны, што сьняць блазны.
Хоць у марах, хоць у сьне
Пасумуй ты аб вясьне.
Выбег зайчык з-пад дуба,
Люлі, люлі Якуба!
Сьпі, Якубе-нябога,
Люлі, люлі старога!
Сам сябе я калышу,
Сон, прыйдзі ка мне, прашу!
Сам сабе я сьпяваю,
Дзе ты, сон мой, пытаю?
Больш сьпяваць не магу,
Сьцішся, сьпі і ні гу-гу!
Выбег зайчык з-пад дуба,
Люлі, люлі Якуба!
Позна, часу ня многа,
Люлі, люлі старога!
1946
|
|
