Дагарэў за брамай небакрай, Месяц паміж воблачкаў плыве. Выйду зноў, як у мінулы май, Басанож прайдуся па траве. Дымная, сьцюдзёная раса, Цёмныя ў траве ад ног сьляды. А такога рослага аўса Я не бачыў доўгія гады. Бач, хмызы спляліся, як павець, Сьветлякі мігцяць, гараць сьвятлей. Перад тым як звонка ў лозах пець, Прачышчае горла салавей. Лашчыцца трава да босых ног. З дальніх паплавоў плыве ракой Ледзь прыкметны сумны халадок – Подых юні ўходзячай маёй. Паімчаць за ёю наўздагон? – Хоць і схопіш – усё адно падман. Дзе каханьне тых мінулых дзён – Весьніх паркаў бэзавы туман? Нават шкадаваньне – дзе яно? Зноў вясна, і жаль зьнікае зноў. (Так губляюць пах перад вясной Ссохлыя сьцябліны палыноў.) Ціха цмокае у сьне рака. О, як добра, як прыгожа жыць! Раска, як русалчына луска, На вадзе ад месяца гарыць. А вакол травіцы роснай рай І бярозак белая сям'я. Мой чароўны беларускі край, Бацькаўшчына сьветлая мая!
1957
|
|