Баляда Папы Рымскага Яна Паўла ІІ
|
І ...Пачаты шлях нібы пачуты голас Бога, Пачуты голас Бога як спазнаны сьвет, Дзе ёсьць касьцёл, царква, мячэць і сінагога, Дзе сьлёзы ёсьць, нібыта росы на траве, Дзе сьпіць спакуса, як агонь, дзе мы згараем І дзе, нібыта крыж адвечны, вера і любоў Нябёсы над зямлёй, як Божы Дух, трымае, Каб кожны шлях, адведзены яму, прайшоў, Каб дараваць, і папрасіць, каб даравалі, І зразумець, што гэты сьвет для нас – ня дым, І мы яго, як Храм, стваралі і ствараем, І ў гэтым Храме, як адна цаглінка, Рым...
ІІ Пражыў жыцьцё, нібы малітву прачытаў, І адышоў у лепшы сьвет, нібы заснуў, Нібы раса, згубіўся ў ціхім шуме траў, Якія, як Хрыста, сустрэлі зноў вясну У гэтым сьвеце, дзе даўно дабро і зло, Нібыта крыж на Храме, у якім сьвятло Сьвятое, нібы Боскае жыцьцё, дзе шлях, Якім прайсьці, каб лепшы сьвет спазнаць, і тло, І сьлёзы, і агонь, і кроў, каб у вяках Нам сьветла і самотна, як цяпер, было...
3.IV.2005.
|
|