Вецер у полі агонь разьдзімае, Попел да неба, як слуп, уздымае, І ўжо, здаецца, на слупе на тым Неба стаіць, як на вогнішчы дым. Воўк ля агню пасівелы сядзіць, Быццам бы ідал, на поле глядзіць. Воўк адзінокі сем дзён не засьне, Будзе маўчаць у чаканьні мяне. Толькі мне ў поле цяпер не хадзіць – Попелу слуп там да неба стаіць. Выйдзе з хаціны сп’янелы сусед, Лаючы жонку і ўвесь гэты сьвет, Пойдзе праз поле адзін да ваўка, Не задрыжыць у суседа рука... Воўк перад сьмерцю, як д’ябал, завые, Пырснуць у прыску вуглі залатыя... Будуць у хатах суседзі сядзець І на суседа праз шыбы глядзець.
|
|