Яшчэ горад ня сьпіць, завываюць машыны, І міліцыі рэдкія 'шчэ патрулі. Рэстаранаў начных залатыя мужчыны Дастаюць з партманэтаў нясьпешна рублі. Хто заплаціць за ежу, ну а хто – за каханьне, Найвялікую ўвагу ўдзяляюць цане. А жанчыны сядзяць, быццам знатныя пані, Яны ведаюць толк у жыцьці і віне. Не люблю рэстараннай падробкі культуры, Калі вецер па вуліцах гоніць сьмяцьцё, Калі цэняць людзей за майстэрства халтурыць І ня цэняць сумленнае майстра жыцьцё. Яшчэ горад не спіць, завываюць машыны, Яшчэ зоркі ў каштанавым спеюць лісці. Не спяшаюць дамоў залатыя мужчыны, Дзе ім трэба лухту соннай жонцы вярсці. Выйдуць пары давольныя светам, сабою І раз’едуцца з ветрам у жоўтых таксі... Мы з тэатра, як з Храма, выходзім з табою І няспешна дахаты ідзём па гразі.
|
|