Я сяджу ля кастра і гляджу праз агонь на дарогу, Па дарозе ідзе мой стамлёны, зажураны цень. І адчайна кляне ўсё на сьвеце, ды толькі – ня Бога, Ён у Бога ня верыць, а верыць ва ўдачлівы дзень. Ён пайшоў ад мяне – захацелася прывіднай волі, Пра якую ён чуў ад варожых і злых галасоў. Напалохаў сабою ён жнеек у полі, Але й сам ледзь уцёк ад раўнівых п’яных мужыкоў. Ён заходзіў, як злодзей спалоханы, у магазыны, Дзе хапае ўсяго, ды купіць жа нічога няма. Як на дзіва заморскае, ён паглядаў на вітрыны, Дзе век рыба людзям свой язык выстаўляе сама. І зімой начаваць ён прасіўся ў пустыя гатэлі, Не пускалі яго, бо прыехаў жа – не з-за мяжы. Прастытуткі яму прапаноўвалі ветла пасьцелі І празь міг праганялі яго з-за наіўнай душы. Нейкі час ён пажыў у рабочым старым інтэрнаце, Дзе выгоды былі на зарослым і брудным двары. Як ён плакаў па роднай забытай і чысьценькай хаце, Як сьмяяліся злосна зь яго абібокі-сябры! І ня зьеўшы яшчэ на'т паўпуда найпершага солі, Як паранены зьвер, ён адчайна і люта зароў: «Забярыце ў мяне гэту вашу славутую волю І аддайце мяне, як сабаку, ў палон ланцугоў!» Каб яго шкадаваць, не знайшлося нікога дурнога, На'т дажджамі пагнаў ад сябе ціхі восеньскі дзень. Я сяджу ля кастра і гляджу праз агонь на дарогу, – Блудным сынам ідзе, мой стамлёны, зажураны цень.
|
|