У ката закахалася паненка, З дурною сьмерцю заручоны кат. Яму паненкі сьвецяцца каленкі, Яму паненкі ласкавы пагляд. А ён, як ноч, пасьля работы чорнай Глядзіць у кубак, дзе, як кроў, віно. Душою адзінокі, быццам воран, Каханьнем не цікавіцца даўно. На шыі крыж вісіць не цалаваны, І крыж цяжкі схіляе галаву. Ты кат, але ці позна а ці рана І ты таксама сыдзеш у траву. Цябе ня знаюць тут, і ты шчасьлівы, Відаць, каб зналі, дык ня жыў даўно б. Усім тут абыякава надзіва: Ці кат, ці князь ты, ці зусім гаўно. Наіўная, спакусьніца-дурніца, Ня знаеш ты, што ён такім, як ты, Галовы сек, што вылі, як ваўчыцы, Ліў волава ў галодныя раты. Паненка коткай круціцца ля ката, Яго асьвечвае сьвятлом грудзей. А ён сядзіць, нібы валун пракляты, Вачмі маланкі кідае ў людзей. Яна злуецца і гарыць бяз дыму: «Ня буду жыць, калі не спакушу. Забудзе ён і жонку і Радзіму І вырве мне з грудзей сваю душу!» Ён кат, але ж і чалавек таксама. І падхапіўся ён і ў ноч пабег: «Ня дай мне звар’яцець старому, мама!» Гайнёй сабак ляцеў за катам сьмех. А крыж на шыі біўся як шалёны, Душу з грудзей сьсівелых выбіваў. Прачнуліся на могілках вароны, І вартаўнік спалоханы сканаў. Кат бег да сьмерці ад жыцьця зьдзічэлы І ўсюды бачыў чарапы і кроў. Паненкі цела голае ляцела На чорным, як той сьвет, крыжы мячоў.
|
|