Зноўку сьнегам засыпаны нашы дамы І, як сьнежныя людзі, па вуліцах мы Ходзім, быццам шукаем чаго ўжо няма. І навокал, нібыта Эўропа, зіма, Ад якой не схавацца пакуль тут жывём І ў тралейбусе едзем, нібыта плывём У жалезным чаўне, дзе нябачны Харон Нас вязе між слупоў, як антычных калён. І мне хочацца выйсьці і следам ісьці За жанчынай, што ведае сэнс у жыцьці, За якое ўсё ж варта што міг паміраць У каменных дамах, што, як горы, стаяць У сьнягох, як самоце, што зьнікае вясной, Калі тут да яе дажывём мы з табой. А пакуль зь неба сыплецца, сыплецца сьнег, Нібы д’яблавы сьмех, нібы д’яблавы сьмех...
|
|