|
Баляда Пятра Мсьціслаўца
|
|
16 стагодзьдзе
|
Друкуеш кнігі, ну а іх баяцца
Царкоўнікі, якім асьвета – зло,
А не жывое божае сьвятло,
Якому быць ня толькі ж у палацах.
І ты з Масквы ў Заблудаў уцякаеш,
У родны край, дзе твой народ жыве
І не губляецца, нібы ў траве,
У шэрым сьвеце, што ня стане раем
Хоць райскага жыцьця ўсе тут жадаюць,
Тут на зямлі, дзе Храмы, дзе турма,
Дзе ты друкар і лепшага няма,
Чым ты, і ўжо ня ў госьці запрашаюць
Мамонічы цябе, а каб у Вільні
Ты кнігі друкаваў для ўсіх людзей,
Якім за родны край краёў мілей
Няма й ня будзе, і ня ўзыдзе быльнік
На курганох, дзе Беларусь сьвятая,
Бо кніга кожная твая сьвятлом,
Нібы анёлак незямным крылом
Нас ад цямнечы злой аберагае...
8.VI.2010.
|
|
