Баляда Яна Кішкі
|
? – 26.07.1592
|
У Княстве Вялікім, як сэрца, Айчына Твая, для якой нарадзіўся, жывеш. Шуміць ля дарогі старая рабіна, Карэньні, як косьці, у пыльнай траве. У Лоску табе сьняцца Рым і Балонья, Дзе ты навучаўся Айчыну любіць Не за тое, што нас яна ўсіх бароніць, За тое, што можам яе бараніць. Друкарню тваю пахваліў бы Скарына, Бо ты, як Скарына, асьвету нясеш. І кнігі твае, як у сьценах цагліны Вялікага замка, што княствам завеш. Пра славу ня марыш, бо слава – атрута, Якая, душу разьядаючы ўсім, Прыносіць аднойчы пажары і смутак, А потым зьнікае, як з вогнішча дым. І ты каля вогнішча крок прыпыняеш, На попел, нібы на былое, глядзіш. І сёньня ты лепшых краёў не шукаеш, І Лоск не заменіць ніякі Парыж. Шуміць ля дарогі старая рабіна І сыплецца лісьце пад колы карэт, Як сэрцы людскія пад ногі Айчыны, Каб ведаў Айчыну тваю белы сьвет.
29.IV.2010.
|
|