Баляда Аляксандра Аскеркі
|
1830 – 11.01.1911
|
...Зноў крыж прыдарожны дарогу вартуе, А ў садзе і ў сьвеце шуміць ліставір. Маёнтак, дзе ты нарадзіўся, сумуе, Бо ты, як паўстанец, сасланы ў Сібір, Дзе ўсё незнаёмае і ўсё чужое, Халоднае, быццам закутае ў лёд. А зоркі ў нябёсах, нібы пад вадою Каменьчыкі ў рэчцы, кудою ты ў брод Хадзіў да каханай, якая чакае. І вернесься ты да людзей праз гады, Каму Беларусь паланянка сьвятая, Якая бяз волі загіне, як ты Бяз любай Айчыны слабы і маркотны. Але табой створаны будзе буквар Вучыць любіць край свой адзіны і родны, Дзе кожны тутэйшы – зямлі гаспадар, Бо ў гэтай зямлі наша кроў спаконвеку, Таму аніколі нікому яе Забраць не дадзім, і шумяць нашы рэкі Пра гэта й пра гэта салоўка пяе. А крыж ля дарогі сьсівее і ў травы Ад ветру ўпадзе, як паўстанец – ад куль. І будуць Айчына і гонар, і слава Пакуль тут такія, як ты, ёсьць. Пакуль...
15 – 18.V.2010.
|
|