Баляда Бенядзікта Дыбоўскага
|
29.04.1833 – 31.01.1930
|
Маёнтак родны твой Адамарын Застаўся безь цябе, як чоўн, адзін На хвалях часу і Эўропы тлумнай, Дзе і табе было зусім ня сумна Ні ў Дэрпце, ні ў Варшаве, ні ў Бэрліне. Прайшоў агонь паўстаньня па Айчыне І дымам ты занесены ў Сібір, Дзе возера Байкал, нібы пацір, Напоўнена чысьцюткаю вадою. Глядзіш на сьнег і бачыш прад сабою, Праз далеч, беларускія азёры, Лясы і рэкі, жытнія прасторы... Ты вернесься дамоў, каб дом пакінуць, Але й пакінуўшы, любіць Айчыну, Ня верачы, што ўсё наўкол ад Бога І нават гэта празь Сібір дарога, Якой ты едзеш, як дамоў, у Львоў, Дзе беларуская ня зьнікне кроў У сэрцы, што па-беларуску б’ецца, Бо гэта беларуса сэрца...
23.IV.2010.
|
|