РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі      Гасьцёўня      Спасылкі      Аб сайце       Кірыліца      Łacinka    
Янка Купала
Вершы
Кантэкстны тлумачальны слоўнік
Ад рана да рана...
Ад рана да рана
Пейце, старцы, дзеці:
Добра меці пана,
А лепей ня меці.
 
Пан за тваю працу
Нібыта й заплаце;
Знай плату з палацу! –
Зьбярэш зь ёй багацьце!
 
За гадзін семнаццаць
Працы ўдзень нязьменьне
Выйдзе грошаў дваццаць,
Або й таго меней.
 
Ой, ды лёгкай служба
Нідзе не бывае,
Бо служба – ня дружба, –
Няволя цяжкая.
 
Трэба ведаць, знаці
Службы гараваньне:
Позна легчы спаці,
А ўстаці зараньне.
 
На слаце й марозе
Рабіці зьзіханым,
Дрыжаці ў парозе
Перад грозным панам.
 
Заціркай найболей
Гавець, разгаўляцца,
Як сьвіньні, на полі
З блыхамі валяцца.
 
Лае пан багаты,
А ты цярпець мусіш,
Хоць не вінаваты,
Языка прыкусіш.
 
Горш якой скаціны
Спаганяць, зьняславяць,
Кляцьбой без прычыны
Спаткаюць, адправяць.
 
Ой, позна і рана
Пейце, старцы, дзеці:
Добра меці пана,
А лепей ня меці.
 
Ў службе гора болей,
Як якіх выгодаў;
Хто ня любіць волі, –
Ня нашага роду.
 
[1905–1907]
 
 
 
 
Падабаецца     Не падабаецца Водгукі
2009–2018. Беларусь, Менск.