РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Янка Купала
Вершы
Кантэкстны тлумачальны слоўнік
Вось тут і жыві...
Няма хлеба, няма солі, –
          Чужому рабі;
Няма шчасьця, няма долі, –
          Вось тут і жыві!
 
Во зіма, – мароз вялікі, –
          Дровы ў Менск цягні;
Дзеткі зьмёрзлі: енкі, крыкі, –
          Вось тут і жыві!
 
Прайшла зімка, цёпла стала,
          Вясна на зямлі,
А тут корму, хлеба мала, –
          Вось тут і жыві!
 
Вясна, лета – час рабочы:
          Ары, касі, жні;
Пот крывавы заліў вочы, –
          Вось тут і жыві!
 
Прайшло лета, прыйшла восень, –
          Падаткі нясі,
А дзяцей абдзёртых восем! –
          Вось тут і жыві!
 
Вот і будзь шчасьлівы, браце,
          Долі не кляні:
Холад, голад, бяда ў хаце, –
          Вось тут і жыві!
 
Працуй цяжка дні і ночы,
          Пагарду цярпі;
Сказаў праўду – дзяруць вочы, –
          Вось тут і жыві!
 
У палацы п’юць, гуляюць,
          Сьвецяцца агні;
Мяне ж з хаты выганяюць, –
          Вось тут і жыві!
 
[1905–1907]
 
 
 
 
Падабаецца     Не падабаецца
2009–2020. Беларусь, Менск.