Не пазнаю цябе, мой Краю, нявечыць людскасьць лад чужы, і прадзедаў зямля чужая, і толькі нашыя крыжы. І толькі нашыя магілы, старыя ў полі курганы – няўжо й мінуласьць нашу скрылі пад тоўстым насыпам яны? Чужым нам ў сэрцы цэляць словам, каб насьмерць роднае забіць, лучынай гасьне наша мова, чужая – лагерам гучыць. Ад сухавеяў, што з усходу, плытчэе Нёман ў берагах, душа малее у народу, мрэ песьня, як падбіты птах. Ў няволі крыльляў не разгорне ні птах, ні песьня, ні душа. На'т белы дзень здаецца чорным, хоць быў жа сонечны сьпярша. Чужы палон, прыгон адвечны махлярствам душы гне і злом, ніжэй ўсё нам згінаюць плечы нябачным нейкім бізуном. Стаяць над намі ўсе чужыя ды сьцёбаюць да працы нас, як быццам страшнага Батыя вярнуўся незабыты час...
1956–1960
|
|