Гнаны холадам, гнаны ветрам, шляхам тундры, у ноч пустым, прабіраецца пяцьдзесят чацьверты за наёжаныя драты. У каго надзея жывая, хто застыў, але не на сьмерць, няхай верыць, няхай чакае, няхай выйдзе яго сустрэць. Толькі чаркі нашы пустыя, мы забыліся смак віна. Ну, а сьлёзы? – Нават і тыя ужо выпітыя да дна. Крочыць прывід, увесь зь цярпеньня, пад канвоем гады прайшлі. А другія такія цені ў гэту ноч устаюць зь зямлі. Сорак першы, другі, сорак трэці, пяты, шосты, пяцьдзесят другі – дань для тундры, шахтаў, для сьмерці жывых душ. За чые даўгі? О, калі ж ты прыйдзеш, жаданы, залаты і шляхотны век, каб галінкай сьвятое пальмы чалавека вітаў чалавек?! Дык сьмялей, браце, супраць ветру яшчэ доўга трэба стаяць, прыйдзе к нам пяцьдзесят чацьверты, выйдзем, выйдзем яго спаткаць. Хай убачыць, няхай пачуе голас ценяў, учора нямых. А не – схопімся зь ім уручную за жыцьцё для усіх жывых!
|
|